Neue Linke

Nöji Linggi isch e Sammelbegriff für verschiideni Persone, Grubbe, politischi Beweegige, Bardeie und Bardeiflügel vor allem in Westöiropa und Nordamerika, wo sit dr Middi vo de 1960er Joor alli mööglige sozialistischi, anarchistischi und anderi politisch linggi Konzept mit eme revolutionäre Aaspruch verdräte häi. Iiri Schwerpünkt si mäistens uf emanzipatorisch-sozialistische und internationalistische Ideal gsi.

Die Nöiji Linggi gränzt sich bi allen Underschiid zwüschen iire Aahänger vo klassische lingge Bardeie ab, sige si vo dr etablierte Sozialdemokratii oder vom Marxismus-Leninismus, wo bis 1990 in de realsozialistische Länder in Ostöiropa an dr Macht gsi isch.

Däil vo dr Nöije Lingge stütze sich aber au uf elteri Theorie und Konzept, wo zum Däil us dr vorstalinistische kommunistische Zit stamme und in dr erste Helfti vom 20. Joorhundert e Rolle gspiilt häi und vo de Staliniste underdruckt worde si. Zu dene ghööre s Konzept von dr sozialistische Röötdemokratii vo dr Rosa Luxemburg oder dr Trotzkismus, wo uf de Ideä vom Leo Trotzki basiert.

Grubbe vo dr dogmatische nöije („orthodoxe“) Lingge, drunder die mäiste dütsche K-Gruppe, luege d Entwigglig vo dr Sowjetunion noch 1956 kritisch aa und leene d Entstalinisierig, wo under em Chruschtschow aagfange het, as rewisionistisch ab. Si bezien sich mäistens uf e Maoismus, aber au uf e Stalinismus oder verwandti Konzept.

In de spoote 1960er Joor häi d Filosofie vo dr Frankfurter Schuel vom Theodor W. Adorno, Herbert Marcuse, Jürgen Habermas und vom Ernst Bloch mit dr kritische Theorii und dr französisch Existentialismus vom Jean-Paul Sartre und André Gorz e wichdige Iifluss uf die Nöiji Linggi ghaa. Verdräter vom Operaismus wie dr italiänisch Ethiker und politischi Filosof Antonio Negri und spööter dr John Holloway häi uf die Nöiji Linggi gwirkt und häi Iifluss uf d Globalisierigskritiker bis in d Gegewart.